NOS SOCIEDADE NOS GUENTES

NB: Na linha e tradição de terra; nós sociedade, nós guentes e nós cultura.
Dia que du parà de escrebe e papia sobre nós cultura [cu nós propi mon e cu nós propi boca], alguém ta escrebe-nu el cu letra e palabra trocado. Avante, Djarfogo!

Nha Maria, por além de roscona é fadjada na po comida na prato, sê sentido de mudjer esperta dja contaba el ma Nené ta constaba na lista de bom comedores.

Antan, el escodje quel prato zinco mas fundo el ba recto pa panela.

Nené que staba encostado na portal de cozinha, ancioso pa odja e senti quel refogada, começa ta canta dento dente, de vez enquanto ta zubia tambem cu dente sarrado, forma de mata tempo, até que el ta pega prato na mon pel da quel zimbrada.

La mê, el fica ta longa cabeça e ta bota odjo dento prato que Nha Maria estaba ta serbi. Qanto el odja um lado prato só cu fijon figuera berde, quel otro lado de Djagacida e derriba cu 2 satadjo carne baca e 2 lasca’l bobra el coça garganta, na manera pel da sinal ma el sta perto, e Nha Maria, claro, sabida mode el é, el ratorce cu elegância e el estende-l mon cu quel prato caculado, djunto quel fala sê fidjo Mané pa panha-l um caneca d’agu na poti pa traze Nené.

Nené, cu tudo pureza fra-l obrigado na linguage corporal (mímica), através dum sorriso que ta come coraçan de qualquer alma caridosa.

Comó Nha Maria tinha que mandaba Nho Mané uns presentes otro dia na Monte Burmedjo, el bia 2 saco cu fijon, bobra canela, cobi, queijo e mantega pel manda-l dento terral cu Nené.
Depôs de galo canta 3 bes, António, fidjo Nha Maria, cela sés muleco russo e Nha Maria compô um balá de quarta e meio el da António pa pô na meio de bomburum.

Tudo em orde,Nha Maria entrega Nené um belhetinho pel da Nho Mané ora quel tchiga. Normalmente, bilhete é pa conta qanto artigos que bai e leba mantenha também. De seguida, Nené po muleco frente e el da caminho pa Monte Burmedjo.

Quanto el camba Beco, el senti ma muleco sta ba devagar, antan, el fala pa mas um companhero de jornada quel pega na viage ma el tem que djuda muleco.

Nho Djon, que ca concheba el, fica meio admirado dento del propi e começa ta atcha estranho sê comberso.

És anda uns 100 metro, antan, Nené fala-l: Nho espera-m pamode m-tem que lebia és carga nes muleco.

Nho Djon espera-l e fica ta espia-l... Nené tra bala el po riba se cabeça e dipos el monta moleco, cu bala riba se cabeça.

Muleco fica ta anda mas devagar, Nho Djon prati graça, e, até que sê matcho preto espanta também.

Nené, tudo natural, fala Nho Djon, assim: Nho ca sta atchà ma nha muleco sta anda mas devagar depôs que m-djuda-l?

Nho Djon, sem pode resiste más el da sê matcho 3 barencada chuati –chuati e el passa-l pa frente pel pode ganha caminhada .

Nené, qanto el odja ma Nho Djon dja passa-l e el tudo sério, el tchuma-l e el fala-l: És muleco é propi preguiçoso.

Nho Djon farto d’arri el panta sê burro faci e el bai animado cu piada quel atcha na sê viaje.
Nené, qanto el odja ma muleco ja deta na tchon, el dixé e el estuda da farto na queijo que staba na balaio.

Farto sê bida el da baxu tudo na zubiu até quel tchiga ca Nho Mané.

Qanto el entrega bilhete, Nho Mané atcha falta de 4 queijo e alguns gufonco de batata doci.

Nho Mané, home sério e posdreto, perguntal: na unde sta 4 queijo e 2 gufonco?

Nené, puro mode el é, el sorri e el fral: Trumode e ca’l ser quel linguarado [bedjetinho] que ja ba conta nho tudo cuza que m-faze na caminho?! Caprizo me m-senti-l ta kras-kras dento aldjibera.
Nho Mané,home de muto lida cu guentes dês tipo, manda frita pexe, ruma latas de atum, bolaxa, grogo e acucra pa manda Nha Maria.

El escrebe um carta fidjado el entrega Nené, cu tudo quês artigos celado na muleco.
Qanto Nené tchiga Cruz de Montinho na Tchada Tchã el para e el fala: Se bedjeti que mas pequinote odja tudo cusa e el ba conta Nho Mané, antan carta é pior.

Nés raciocínio, el enterra carta e el fra: m-sta enterra-bu e nem cruz m-ca ta pobu pa sinal ca fica, linguarados.

Feto assim, el finca pé el da pó na atum cu bolaxa e quanto el tchiga ca Nha Maria el entrega muleco e el ca nem espera descela. El ba pa Mostero e até hoje Nha Maria ca sabe cuze que Nho Mane po-l na carta.

Napoleão Vieira Andrade