CUMA UUU!

NB: Comberso sabido na linha e tradiçan de terra; sementera de Nho Pedro Cardoso que ta serbi-nu pa azagua. Ai se du dixa sementera caba... Es é um passage que passa na Fogo, na quês tempo que cá tinha telefone. Tota era um senhora que ta bendeba e se casa era aberto 24 hora. Mudjer de povo e pa povo.

Nho Djon – Ó nha Cumaaa! Cuma uuu!

Parbedja - Oooi, cumpa Nho Djon, cuze?

Nho Djon - Nha cá pode fra-m se nha sta bem de ca Tota, pa-m pode ba la recto paga nha conta?

Parbedja – Nho rapiti pamode m-obil trapadjado...

Nho Djon – Nha ca pode fram se nha sta bem de ca Tota?

Parbedja - Nha minis e nha Maria, nhos serbi-m testemunha, pamo cumpa dja farta-m ruspeto na frente nhos tudo.
A ca de Ré é é! Mi cumpa dja fronta -m cu nha marido e cu tudo mundo. Cuze que m-ta faze, mama?
Bandurria pa sisim, não! Nhos serbi-m testemunha pamo dja-m funda Bila pa-m mostra cumpa qanto m-bale.

Trampolina tranca, Nho Djon fitcha porta, até que Cabo-chefe bem tchiga.
Tudo pronto na tribunal, Juiz começa pa queixosa, na seguinte tom:
Senhora Parbedja o que é que a senhora ouviu da boca do senhor João?

Perbedja, tudo engasgado, cu tremura na canela, explica tudo e testemunha confirma ma Nho Djon pergunta-l em voz alto e bom som se Perpedja stà ta bem de cá Tota. Quês otro que staba presente fica tudo ta cochicha, sinal de cre fala ma razão sta de lado de Parpedja.
Obido Perpedja, tchiga bes de Nho Djon, confiante e cu ar de sabedor.
Qanto Juiz da-l palavra el pedi um quadro preto e um giz. Juiz fra-l paqui? Antan, el insisti e depôs és da-l.

Antes de-l papia el escrebe na quadro cuza quel fra Perpedja: Nha cá pode fra-m se nha sta bem de cá Tota, pa-m pode ba la recto paga nha conta? Depos el le-l em voz alto, ta explica palavra por palavra na se contexto real, cu ex: ...se nha sta bem de cá Tota, pa mim e pa nós tudo na criolo ta significa o seguinte: Bem de ca Tota é mesmo que fala se nha sai de casa de Tota. Cá, nés contexto ta significa abreviação de casa.

Qanto Nho Djon sinta explica se comberso, juiz, Parpedja e tudo alguém fala sim senhor. Ago du meste tra tudo alguém que tem nome de Tota pa du pôs Tayota. Forte confusão na comberso criolo ora que Tota sta na meio.

Graça tuma na tribunal, até que juiz manda dá Nho Djon condecoração de Doutor, HONORES CAUSA.
Napoleão Andrade